मी झालेच नाही

मी अशी गझल जी मतल्यातच अडकून पडली
काफिये रदीफ दूर मूळ मात्रांतच होती चुकली

मी धृपद नव्हते कडाडणारे नव्हते ठुमरी वेडी
मी लकेर कोवळी नवथर होते हुकली मुकली

मी नव्हते मुरली किंवा राधा श्रीरंग ल्यायलेली
मी मीरा होते आभासात तयाच्या वेडी जी झाली

मी रडले तेव्हा आकाशी या घन कळवळले नाही
पण भल्या पहाटे प्राजक्तावर दवनक्षी होती सजली

मी झालेच नाही तुझी कविता लयीत फुलती खुलती
मी निम्मीशिम्मी अशी निर्मिती मनात राहून गेली

अनुजा